|
Does my love
ride or does he rin,
or does he walk the woods amang?
He vowed this nicht tae come tae me,
alas my love he is ower lang.
He disna ride
nor does he rin’
but aye he walks alang his way,
he thinks mair on his fair new love,
than he does on the licht o’ day.
He saw a hound
draw near a hare,
and aye the hare draw near a toon,
and that same hound has won the hare,
but Willie’s won tae ne’er a toon.
As he gaed ower
yon high, high hill,
and on and doon yon dowie den,
it’s there he spied a grievous ghost,
that wad fear ten thousand men.
He hurried on
through Mary’s kirk,
and on and doon by Mary’s style,
and wan and weary was the ghost,
that upon him grimly smiled.
Lang ha’e
ye traivelled this road Willie,
lang ha’e ye traivelled it in sin,
but ye’ll neever traivel this road again,
for yer days on earth are dune.
Lang ha’e
ye traivelled this road Willie,
yer fair new love all for tae see,
but ye’ll neever traivel this road again,
for the slightin’ o’ the bairn an’ me.
Lang ha’e
ye traivelled this road Willie,
wi’ ne’er a thocht o’ charity,
but ye’ll neever traivel this road again,
for this nicht I’ll ‘venged be.
His Faither
and Mither they baith mak moan,
his fair new love, she grats fu’ sair.
his Faither and Mither, they baith mak moan,
but his new love tears her hair.
|
