|
As I gaed by
yon brig O Dee and by yon hill o broom,
A lassie
sang richt merrily just as the sun gaed doon,
O Cairn o' Mount is bleak and bare and cauld is Clochnaben,
And ye maun see the snaw lie there alang the simmers end.
I lighted aff
my dapple grey and walked by her side,
Said, Lassie I have lost my way amang yon moors sae wide,
Yer cherry cheeks yer gowden hair, yer e'en sae bonnie blue,
The langest nicht I'd blithely share tae kiss yer cherry mou'.
O lassie will
ye gang wi me and leave yer cauldrife glen,
I've gowd in store and ships that sail, I've wealth baith but and
ben,
Wi silks and satins buskit braw and ribbons tae yer hair,
And maids tae answer when ye ca', who could ye ask for mair.
Tho' ye had
a' the sun shines on ye'd no be a match for me,
My Donald he is a' my care, ride on and let me be,
He meets me on yon high high hill, his hert is leal and true,
If Donald heard my angry shout he soon would mak ye rue.
O lassie think
yer Donalds poor has neither calf nor coo,
A shepherd straggling on yon moor is no a match for you,
O Cairn o' Mount is bleak and bare and cauld is Clochnaben,
And I'd rather meet my Donald there than be fair Scotlands Queen.
O lassie I am
loath tae tell ye throw yer love awa'
Yer Donald brawly kens himsel last gloaming what I saw,
As I passed by yon shieling door I spied a heiland maid,
Yer Donald kissed her o'er and o'er and ro'ed her in his plaid.
Tho' ye would
sware wi' solemn oath what ye hae tellt tae me,
I wouldnae doubt ma Donalds word but say fause loon ye lee,
Then he's taen aff his lowland gear combed doon his yella' hair,
Said lassie ye've been true tae me, noo we maun pairt nae mair.
Nae mair I'm
keeper o yon glen but laird abune the Dee,
And since ye hae been true tae me I'll aye prove true tae ye
O Cairn o' Mount is bleak and bare and cauld is Clochnaben
And ye maun see the snaw lie there alang the simmers end.
|
